BLOGGER TEMPLATES AND TWITTER BACKGROUNDS »

السبت، 17 أبريل 2010

طابور العيش




أزيكم...... وحشتونى
انا مش هتكلم زى ما توقعتم من عنوان الموضوع عن أزمة العيش فى بلدنا لأن العيش أصلا عندنا فى البلد دى زى الفل.....ومفيش اى مشكلة... مفيش أزمة أصلا.. بس بعض الجاحدين والناكرين لجمايل الحكومة هما إلى بيقولوا كدة.. العيش فى بلدنا متوفر بكثرة فى كل الأفران رغيف العيش الواحد يكفى يأكل عيلة من 5أفراد العيش ابيض زى الفل زىالعيش المخبوز بتاع الفلاحين....دا كمان الحكومة بتستورد أجود انواع القمح والدقيق من بلاد برة علشان تخبزلكم عيش وبتجبلكم شحنات قمح مسرطن وفاسد( قصدى قمح مستورد درجة أولى).. عيش غنى بالحديد اة فية مسامير حديد ولا مش حديد.... دا كمان من كتر حبهم فينا حطين لينا فيتامينات حشرية أشى صراصير.. وشوية نمل يلا خير وبركة ... أما بقى العيش فالحكومه عاملة لينا خدمة التوصيل للمنازل يعنى مش بنقف طوابير بالساعات علشان نجيب بنص جنية عيش للعيال.... اما بقى شهيد العيش فدى إشاعات مغرضة علشان تبوظ إنتاج بلدنا....
(برجع وأقول العيش مش فية أزمة ياجماعة
تكملةبقى لمهزلة طابورالعيش
.... انا كل يوم بعدى من على فرن عيش جانبنا بلاقى مشهد غريب طابور الرجالة واصل لأخر الشارع بس واقفين بنظام ومستنين الدور... اما بقى طابور الستات ياساتر يارب فضايح كل ست مسكة ودان التانية وبتكلم ولى بتشاكل مع الى قدمها أصلها أخدت مكانها فى الطبور... دى وصلت لشد الشعر والطرح بجد واللة؟؟؟؟؟ ونلاقى طابور الرجالة الى فى اخر الشارع خلص وجة ناس مكانهم اما بقى طابور الستات لسة زى ماهوا ما تحركش ولسة بردة الستات عمالة تتشاكل مع بعضها... والراجل بتاع الفرن مطنشهم وبيدى للرجالة

السؤال الى بيجى فى بالى لما بشوف المنظر دة ازاى المرأة قادرة تجمع بين نقيضين النظام وعدم النظام....أزاى الست ربة الاسرة الى بتدير بيت كامل وبتربى وتطلع أجيال أزاى المرأة الى الوقت بقت وزيرة وقاضية ومديرة وفى بلاد تانية رئيسة أزاى الست لما تيقى نصف الحياة وانا فى رأى هى الحياة كلها يبقى ده سلوكها
(سؤال لسة مش عارفة لية أجابة).. هو دا أصلا الموضوع الرئيسى الى كنت هتكلم فية بس بصراحه قلت لازم الأول أدافع عن أنتاجنا الوطنى للعيش بعد كل الأشاعات المغرضة الى سمعتها عنه ودقتها وشوفتها بنفسى
أما بقى العيش الى فى البوست فدا هدية منى لكل زوار المدونة كل واحد ياخد رغيف واحد بس ودا مش صناعة بلدنا لا دا مستورد بالسمسم.... يلا رحمتكم من الوقوف فى الطابور








37 الناس الى سقعوا من الثلج:

الملاك الحزين يقول...

هههههههههههههههههههه


هما كده الحريم فضحنا فى كل مكان

بدل ما يكونو قدوه حسنه لينا يعملو كده

هو احنا بقينا عوانس بقله يا اختى

ههههههههههههههههههههههههههه

الملاك الحزين يقول...

احنا بقا عندنا العيش موجود ومتوفر بس للاسف انا بيوم ما من حوالى اسبوعين باكل بفطر برغيف عيش
وعينيك ما تشوف اللى النور لقيت هديه فى الرغيف
تتوقعى ايه

ها

؟
؟

لقين صرصار والله العظيم ومن يومها جاتلى قرفه من العيش وبقينا نخبز كل كام يوم على قد احتيجانا

والحمد لله على كل
وحشتينى بقا فينك كده
يارب تكونى بخير

ليله شتاء يقول...

السلام عليكم
علشان دائما انا بجى متأخره أنا هاخد تعليقين
طبعا واحشتينى وأنا أستنيتك العصر بس مكنش فى نصيب نتكلم

ليله شتاء يقول...

والتانى بقى بس يارب ميكنش متأخر برده
طبعا كالعاده موضوعك جميل أنتى عايزه اللى ينتقدك بس بجد الموضوع جميل بس مش زى عيش بلادنا اللى ملهوش مثييييييييييييييييييييييييييييل
ههههههههههههههههه


دمتى فى خير
أحبك فى الله

ريمان يقول...

ههههههههههههههههه


اصلا بيحصل مهازل اكتر من كده فى طابور العيش


بس فعلا طلعنا ظالمين حكومتنا ومش حاسين بالنعمه اللى احنا فيها

العيش المسمسم الجميل الطازه الكبير الابيض المتوسط

ههههههههههههههههههه

ريمان يقول...

ههههههههههههههههه


اصلا بيحصل مهازل اكتر من كده فى طابور العيش


بس فعلا طلعنا ظالمين حكومتنا ومش حاسين بالنعمه اللى احنا فيها

العيش المسمسم الجميل الطازه الكبير الابيض المتوسط

ههههههههههههههههههه

الملاك الحزين يقول...

ايه الجمال ده كله
وكمان اول تعليق
انا حظى زى الفل
ياجدعاااااااااااااااان

من كل بستان زهرة يقول...

فاطومه
أخبارك ايه؟

ايه يا بنتي مفيش حتة جبنه مع رغيف العيش ده بطلي بخل

وبعدين فعلا دي حقيقه العيش بتاعنا زي الفل وأبيض وكبيييييييييييييير

وبنص جنيه الرغيف وفي المواسم الرغيف الواحد بجنيه
بطلوا بقى الحركات دي هي الحكومه هتعمل ايه ولا ايه

وبعدين يا فاطمه بطلي الأشاعات دي عن الستات لحسن أجبلك ماما مشيره خطاب

يابنتي عايزه تبوظي أي حاجه حطي فيها ست وهي تخربهالك

وسمعيني أحلى تحيه للستات

تحياتي يا جميله

مجرد فتاة يقول...

هي دي مصر يا عبلة
المصريين اهمة حيوية وعزم وهمة
هههههههه
الحمد لله انا عايشة برة مصر اساسا وعندنا هنا مشوار العيش دة مياخدش 5 دقايق
عقبالكم
تحياااااااااتي

Ms Venus يقول...

معاكى حق والله يا فاطمة


بس اللى انتى بتشوفيهم دول اكيد كده بردو فى بيوتهم


شىء مؤسف جدا

well يقول...

العيش فى بلدنا متوفر بكثرة فى كل الأفران رغيف العيش الواحد يكفى يأكل عيلة من 5أفراد ....
...
...بدأت احس انك حزب وطنى

..
سلوك المرأة .. ثقافة

تحياتى

فاروق بن النيل يقول...

فاطمة .. إمرأة من تلج ...
أزمة العيش ليست الأزمة الوحيدة والله لوكانت هيا بس لكنا إتحملناها حتى لوخبزنا زى زمان من جديد فى بيوتنا
ولكن هناك أزمات أخرى أعمق وأكبر شوفيها بمدونتى :farouksam.blogspot.com(عصفورالجنة)

انسان عادي يقول...

احم احم
سلامو عليكو
سؤال بس صغير
هو اللي في الصورة ده عيش ؟؟؟
اهو ده ممكن نقف له طابور يستاهل يعني
بس عارفه انا اكتر حاجة بكرهها في حياتي هي الطوابير
وافتكر في الكام وعشرين سنة اللي انا عشتهم دول رحت فرن العيش ده مرتين بالظبط
مرة رجعت بالعيش ومرة رجعت فاضي
وكانت النهاية معايا ههههه

اما بالنسبة للست بقي اللي بتنظم بيتها ومش قادرة تستجيب للنظام العام
فدي .............
مش عارف والله
تصدقي فعلا حاجة تحير
بس ده زي الراجل مثلا اللي تلاقيه في مكان محترم جدا وله مركزه
وفي مكان تاني تلاقيه مسخرة
حاجة زي ازدواج في الشخصية
نابعة من الثورة علي النظام
(النظام هنا يعني الروتين عشان محدش يفهم غلط)
فبيحاول يكسر الملل
نفش الشئ يتعمله المرأة
ده من وجهة نظري يعني

بس

ذو الوجه المبتسم يقول...

السلام عليكم

تعرفي المشكلة فى ازمة العيش بجد ايه

الطمع بتاع اصحاب المخابز

اللى بياخدوا الدقيقي ويبعوه باسعار خيالية
علشان يكسبوا اكتر

لو كل مسئول خلى عنده ضمير

اعتقد وقتها الحال هيتعدل بجد

تحياتى لك

ليله شتاء يقول...

طبعا أنتى أول تعليق اذا كنتى لسه موجوده أفتحى الايميل علشان أنتى واحشانى جداااااااااا

رشيد يقول...

تصريح جميل...
قضية أن المراة التي كان من المفروظ أن تكون تساهم في النظام لكونها مربية أجيال، وأنها في بعض الدول تعمل (وزيرة وقاضية...)لكن عندنا المرأة رمز الهرج والمرج إلا من رحم ربي... لا نظام في الكلام ولا نظام في الطوابير ولا نظام...في أي شيء أخر..
كل واحد تفكر في دورها فقط..وأقول لك أختي شيئا ليست النساء فقط من يتميزن بهذه الخصلة فمن الرجال كذلك من هو أكثر...وهذا نابع من فقدان التربية...فاللهم ألطف يارب.

طابت لي القرأة هنا شكرا.

رشا يقول...

ده رد فعل طبيعى للمجتمع الذكورى اللى بنعيش فيه

new-one يقول...

ههههههههههههههههههه
هوا دا الكلام:))

new-one يقول...

ههههههههههههههههههه
بوست رائع بالفعل
وعمار يا مصر

القمرالباكي يقول...

السلام عليكم ورحمه الله وبركاته

ازيك ياجميل

حلو اوي الكلمتين الاونطه الي انتي قولتيهم في العيش والحكومه ههههههه بجد يعني انتي تمام كده

طبور العيش بقي ماهو لازم الستات يكونو كده امال يرغوا فين ويتشاكلوا فين
بس ملاحظتك صحيحه لان الست دي هي الاخت والام والزوجه والموظفه الي المفروض اساس عيله وبيت وكيان بتنظم وتهتم بشئونهم يمكن بيتجننوا بره البيت مش عارفه
لكن صدقيني مش الكل في ناس محترمه وبتحب النظام واد المسئوليه ركزي كده في الطابور هتلاقي في ناس وقفه تمام ومربعين ايديهم هههههههه

دومتي بكل خير وسعاده

حصان المرجيحة يقول...

عيش؟
هو يعني ايه عيش؟
قصدك اللي كنا بناكله زمان و نغمس بيه
ياااااااااه ايام الزمن الجميل
الله يرحم الايام دي

عرفة فاروق عبد لله يقول...

السلام عليكم

انا قلت ادخل فى الصيف احسن علشان اسقع شوية بدل النار اللى احنا فيها

القاكى كاتبة فرن وطابور وعيش ايه الحر ده

ما علينا

ومين قال ان فى ازمة عيش
هو الناس كانت اشتكت ولا فتحت بقها ده كلام جرايد
وموضوع الستات هو فى ستات فى مصر اصلام

احم
دا انا نسيت انى بتكلم مع بنت

بصى يا ستى المرأة بالتأكيد هى كل المجتمع وده رأى من زمان
وانا ناشر موضوع عن المراة على المدونة والفيس بوك

المهم

لنا لقاء آخر

كل التحية

لولا وزهراء يقول...

فطووووووووومه

طبعا يا بنتى مافيش اى ازمه فى العيش ولا فى اى حاجه
الدنيا فله شمعه منوره وكل حاجه ميه ميه ولا فراخ الجمعيه هههههههههههه


يا فطوم الستات فى اى مكان حاجه تكسف بس بصراحه مش كل الستات علشان بس مش نظلم اى حد
اولا كل اللى اسمهم فاطمه سكره وشربات ورد ومربى مشمش
وكمان يادوب هما حولى 95% من الستات يفقعوا المراره

بوست تحفه بجد
تسلم الايادى

كانت معاكى زهراء واسمى الحقيقى فاطمة الزهراء

:) QŁp 7āZēŋ يقول...

انتى عايزه تقنعينى ان اللى فى الصوره ده عيش
لالالالا يا ماما ده بسكويت ده تحفه
ده يتعمله تمثال
-------
بس والله تعالى كده واتفرجى ع طبور العيش هتشوفى السيرك القومى
ومش هتبطلى ضحك ع خلق الله
تقريبا هو ده مشروع الحكومه عايزانا نضحك

:) QŁp 7āZēŋ يقول...

الملاك الحزين
......
معلش هارد لك المره دى لقيتى صرصار المره الجايه هتكسبى مرسيدس

عاوز اصحي يقول...

انا عاوز ارد علي البوست اللي فاتت
بجد القصه بتاعته فظيعه وازاى ان الواحد لو فضل مثلا يقنع نفسه بأنه فاشل مع انه مش فاشل هيبقي فاشل

في حياتنا ناس سلببين كدا يحبطك اذا كنت هتعمل حاجه,,,,, ياعم مش هتقدر والكلام الفكسان دا ودول صحبه تجيب لورا الصراحه

تحياتي

محمد محمود يقول...

انا مش عارف الناس مضايقه من موضوع العيش ده ليه بصراحه كتير قوي الحكومه موفرلنا كل حاجه بس لازم يعني نتعب شويه مش كل حاجه علي الجاهز يعني بصوا للبلد من الجانب الكويس مش من الجانب السيء يعني التعليم والتأمينات والمعاشات والوظائف الكتير قوي الي في البلد الي من كترها بقي يعنيوا الشاب منا في 3 اربع شغلانات هنسيب ده كله ونعلق علي موضوع العيش
هقول ايه بس ؟ بلد مابيعجبهاش العجب

طهر فؤادك يقول...

السلام عليكم ورحمة الله وبركاتة

ربنا يهيديهم يارب اللهم امين والمسلمين

وياريت تكون نساء المسلمين ملتزمين فى المظهر والجوهر علشان يبقوا قدوة وسبب هداية ان شاء الله لنساء كتير ..

فربنا يتقبل وقولوا امين يارب العالمين ..

اما عن العيش شكرا على الهدية الغالية دى ..

حصان المرجيحة يقول...

تعرفي ايه المشكلة
ان مافيش مشكلة
و الناس بتقول مافيش عيش
و هما اللي بيرموه علشان ياكلو عيش كايزر
و بقو ياكلو توست
و قال ايه السبب في الحكومة
ههههههههههههه

من كل بستان زهرة يقول...

فاطومة ايه أخبارك؟؟؟؟

طمنيني عليكي يا جميل

وحشتيني جدااااااااااااا

يارب دايما تكوني بخير وسعادة

شذا الروح يقول...

يالهووووووووووى

الحريم فضحونا جامد اووى

هههههههههههههههههه

احيكى على البوست الجميل اللى دمه خفيف زى صاحبته

تقبلى مرورى حبيبتى
وهضيف المدونه للتواصل ان شاء الله


تحياتى شذا الروح

من كل بستان زهرة يقول...

فاطمة انا بجد قلقت عليكي

ياريت تطمنيني

يارب يكون المانع خير يا جميله وحشتيني أوي

صوت من مصر يقول...

على الطلاق بالاربعه
العيش اللى عندنا مش بشوفه
الحمد لله بطلنا نشترى عيش وبناكل مكرونة ورز وغالبا مكرونه لانها رخيصه وبتنفخ

الشـوكة الــنـاعـمـة يقول...

امال سموهم ليه حريم
بس النوعيه اللى انتى بتتكلمى عنها تختلف كتير عن نوعيه الوزرا والعلماء والناس الوصله دى
كل واحد بيتصرف زى مابيئته علمته
ومش كل الناس زى بعضها
وبجد مرسيه على التوضيح على جمايل الحكومه ان بعض الظن اثم تصدقى كنت هاظلمهم
معلش بقا ربنا يخاليهم ويتجبوا علينا
تحياتى

ليله شتاء يقول...

بجد واحشااااااااانى جداا ونفسى نتكلم مع بعض تعااااالى بقى

basma bahaa يقول...

هههههههههههههههههههههههه اسلوبك حلو اوى
بس ياريت بلاش تقولى قاضية دى تانى:))
خليها قاضى نتخلى عن الته المربوطه احسن من معنى قاضية دا-مصيبة-:))

على فكرة بيبقى فى عشرة بينهم بسبب الطوابير دى..دا فطابور الانابيب الناس كات بتبات فى الشارع! هتقف كل دا من غير مايتكلموا!!!
بلدنا بتنمى فينا روح التعااون والاندماااج والمرووونة وكيفية التعامل مع كل انواع البشر..الله يخليك يا ريس! اما شعب جاااحد صحيح!

amr elsharqawy يقول...

هههههههههههه
انا جاى اخد الرغيف بتاعى واروح افطر بقالى شهرين فى الطابور لحد ما الناس دلتنى
على الرغيف الوطنى
فالتحيا الحقيقه الساخره